Loading...
Enciklopedi

Hafiz AliPodgorica (1855-1929)

Hafiz Ali Podgorica (1855-1929) – Ka lindur në Podgoricë e më pas familja e tij zhvendoset në Shkodër, ku kryen studimet dhe merr titullin e hafizit. Pasi mbaron studimet në Shkodër shkon në Stamboll dhe mbaron studimet për drejtësi dhe merr titullin kadi. Në fillim të shekullit vendoset në qytetin e Durrësit me detyrën e kadiut. Këtu ai njihet me qarqet intelektuale patriotike të qytetit dhe siç ishte i brumosur me idealet kombëtare merr pjesë gjallërisht në jetën patriotike të qytetit, duke u anëtarësuar në klubin “Vëllaznia” të vitit 1907, i pranishëm gjatë gjithë veprimtarisë së kësaj Lëvizje deri në riformimin e saj me klubin “Bashkimi”, ku edhe anëtarësohet në këtë klub. Shok i Ismail Qemalit, Jani Vretos, Koto Hoxhit, njihej me ta që kur ishte student në Stamboll. Ai ishte një nga ithtarët e flaktë të gjuhës shqipe, gjë që e tregoi edhe në Kongresin e Dibrës së Madhe 1909. Në vitin 1909 zgjidhet kryetar i Bashkisë për qytetin e Durrësit deri në vitin 1912. Në detyrën e kryetarit të bashkisë ai kishte si principe bazë autonominë e administratës shtetërore dhe ndershmërinë në detyrë. Zgjidhet për pak kohë edhe nënprefekt i qytetit të Krujës. Hafiz Ali Podgorica ishte personi më i kompletuar për të përballuar detyrën e kryetarit të bashkisë, duke pasur si meritë, që në momentin kur po e merrte detyrën më 1909 të hedhë kështu bazat e administratës shqiptare. Është e kohës së tij vula e Bashkisë së Durrësit, ku si figurë qendrore është shqiponja dykrenore. Më 26 nëntor 1912 me rastin e ngritjes së Flamurit Kombëtar në qytetin e Durrësit i takon nderi Hafiz Ali Podgoricës ta ngrejë atë. Në vitin 1914 me vendosjen e qeverisë së Esat Pashës në Durrës i konfiskohet shtëpia. Ndërron jetë në Kavajë më 1929[1].


[1] Hidri, Sali. Durrësi 1900-1939, Acustica, Durrës 1997, fq. 82-83.